EDITORYAL - Kelan maghihigpit? Kung marami nang infected?

NAGHAHATID ng pangamba ang kaluwagan ng Department of Health (DOH) sa mga pumapasok na travellers na galing China. Sabi ng China, hindi pa raw dapat maghigpit at hindi pa dapat magsara ng border. Hindi pa raw nakaaalarma ang sitwasyon sa China. Halos ganito rin ang pananaw ni President Marcos Jr. bago siya nagtungo sa China noong Martes. Nakabalik na sa bansa ang presidente mula sa tatlong araw na pagbisita sa China.

Ilang araw makaraang ihayag ng DOH na hindi pa naman dapat maghigpit sa mga papasok sa bansa galing China, walong Pilipino na nagmula sa nasabing bansa ang nagpositibo sa COVID-19. Kinumpirma mismo ng DOH na ang walong Pinoy travellers ay dumating sa bansa mula Disyembre 27, 2022 hanggang Enero 2, 2023. Ayon sa NAIA-Bureau of Quarantine, ang mga Pinoy ay hindi bakunado. Agad silang isinailalim sa antigen testing at nagpositibo sa COVID. Muli silang isinailalim sa confirmatory RT-PCR testing at muli umanong nagpositibo. Naka-isolate na umano ang walo.

Ngayon naghihigpit ang DOH sa mga pumapasok na travellers galing sa China. Sana noon pa ito ginawa para wala nang nakapasok sa bansa na kinatatakutang virus. Paano nakasisiguro na walang nakapasok na virus? Ilang linggo nang naghigpit ang U.S., Italy, India, Japan at iba pang bansa mula sa mga manggagaling sa China. Lahat ay kailangang may negative RT-PCR testing bago makapasok. Pero dito sa Pilipinas nanatiling maluwag. At kung kailan mayroon nang mga nagpositibo saka lamang maghihigpit.

Ang ganitong pangyayari ay nagpapaalala sa naganap noong Enero 6, 2020, kung saan unang napabalita ang pagkalat ng “misteryosong sakit” sa China. Hindi rin naghigpit ang bansa at tila binalewala ang sakit. Huli na nang malaman na may nakapasok na sa bansa na dalawang Chinese woman na mula Wuhan City na positibo sa sakit.

Ang kasunod niyon ay ang mabilis na pagkalat ng sakit at ang pagkamatay nang maraming Pinoy. Kung sa una pa lamang ay naghigpit na, hindi na sana kakalat ang COVID-19. Nakaiwas na agad sana,

Naghahatid ng pangamba ang pagiging relax ng DOH sa kabila na mayroon nang mga tinatamaan ng COVID. At isipin pa na marami pang Pilipino ang hindi bakunado. Hindi pa handa sa muling pagsalakay ng sakit.