Babae sa U.S., nanalo ng $10 m dahil sa maling scratch card na nabili!

BUMIBILI sa isang scratch card vending machine si LaQuedra Edwards nang maling card ang nabili niya at ito ang naging dahilan para matamaan niya ang jackpot prize!

Kakasalang lang ni Edwards ng $40 sa lottery vending machine sa isang supermarket nang may ­lalaking tumabig sa kanya. Dahil dito, napindot niya ang maling ticket at napagastos siya sa 200X Scratchers ticket na nagkakahalaga ng $30.

Nainis si Edwards dahil ang plano lamang niyang bilhin na scratch card ay mga mumurahin at hindi kasing mahal ng 200x Scratchers ticket. Bukod dito, hindi humingi ng paumanhin ang lalaki at dire-diretsong lumabas ng supermarket.

Nasa loob na ng sasakyan niya si Edwards nang kaskasin ang scratch card at nagulat siya sa napanalunan niyang $10 million. Hindi makapaniwala si Edwards at saka lamang siya nakasigurado na siya ang nanalo ng jackpot prize nang makauwi siya sa bahay.

Ang plano ni Edwards sa kanyang napanalunan ay bumili ng house and lot at magtayo ng isang non-profit organization.