Mga empleyado ng isang restaurant sa New Jersey, nakatanggap ng $1,000 tip

NALUHA ang mga empleyado ng isang restaurant sa New Jersey matapos na ang isang longtime customer nila ay mag-iwan ng $1,000 (katumbas ng P50,000) na tip para lamang sa bill niya na umabot lamang ng $43.18 (P2,100).

Ayon kay Arnold Teixeira, may-ari ng kabubukas lamang na restaurant matapos ang lockdown sa kanilang lugar, ay nag-iwan pa ng maikling liham ang customer sa kanyang mga staff.

Sa kanyang liham, nagpasalamat ang customer sa mga empleyado ng restaurant para sa patuloy nilang serbisyo sa kabila ng pandemya at sana raw ay malaman nilang pinapahalagahan niya at ng kanyang pamilya ang kanilang pagsasakripisyo.

Hindi naman napigilan ng mga staff na maluha mula sa ginawa ng customer.

Ayon kay Teixeira, pinag hati-hatian ng pitong empleyadong pumasok noong araw na iyon ang $1,000 tip.