BINASAG ng Swiss na si Matthiaz Kyburz ang world record para sa pinakamabilis na pagtakbo ng 50 kilometro sa treadmill nang takbuhin niya ang nasabing distansya sa loob lamang ng dalawang oras at 56 na minuto.
Wala raw balak si Kyburz na gawin ang world record attempt ngayong taon ngunit nang ma-kansela at ma-postpone dahil sa coronavirus pandemic ang mga karerang kanyang planong salihan ay minabuti na niyang gawin ito ngayon upang hindi masayang ang ensayong ginawa niya nitong nakaraang winter.
Hindi lamang ang world record ang nakamit ni Kyburz dahil nakalikom din siya ng $6700 (katumbas ng P340,000) na donasyon upang labanan ang pandemic sa Switzerland.
Ito na ang pangatlong beses ngayong 2020 na nahigitan ang world record para sa pagtakbo ng 50 kilometro sa treadmill. Marahil ay bunsod ito ng lockdown na ipinapatupad sa iba’t ibang bahagi ng mundo kaya napipilitan ang maraming bilang ng runners na tumakbo na lamang sa loob ng kani-kanilang mga tahanan.