Pinakamatandang lalaki sa mundo, mag-isang ipinagdiwang ang kaarawan

MARAHIL, hindi malilimutan ni Bob Weighton ang kanyang ika-112 na kaarawan.

Ipinagdiwang ng taga-Hampshire, England na si Weighton ang kanyang birthday noong nakaraang Linggo ngunit sa halip na mag-party kasama ang kanyang mga pamilya at kaibigan, mag-isa niya itong ginunita dahil sa coronavirus pandemic.

Nagawa pa rin naman siyang kantahan ng “Happy Birthday” ng mga staff ng assisted living facility kung saan siya nakatira. Nakatayo nga lang ang mga ito sa labas habang si Weighton ay nakikinig sa kanyang balkonahe.

Nakatanggap din si Weighton ng kakaibang regalo na isang plaque mula sa Guinnes World Records na kumikilala sa kanya bilang pinakamatandang lalaki sa mundo matapos mamayapa ang dating world record holder na si Chitetsu Watanabe noong nakaraang Pebrero 23.

Bagama’t napagdaanan ni Weighton ang 1918-1920 Spanish Flu pandemic at dalawang digmaang pandaigdig ay iba pa rin daw ang nararanasang sitwasyon ngayon na dulot ng COVID-19.