Kung nagtanim ka ng magandang pakisama sa in-laws mo…

SA kasamaang palad, nagkaroon ng diperensiya sa reproductive organ si Aleli kaya tinapat silang mag-asawa ng doctor na hindi na ito kailanman magbubuntis. Noong una ay okey lang kay Randy, pero nang sumapit sila ng 10^th  wedding anniversary, nababagot na siya sa buhay nilang mag-asawa. Sa tuwing may manganganak siyang hipag o kapatid, nakakadama siya ng sobrang inggit. Su-misigaw ang kalooban niya: Gusto kong magkaanak!

Hindi bukas ang isipan at kalooban niya sa ideya na mag-ampon sila. Parang ang hirap naman yatang magpalaki  ng batang hindi mo naman kaanu-ano.  Aba e, mabuti pang palakihin na lang niya ang anak ng mga kapatid niya na hirap sa buhay. Kadugo pa niya ang mga ito.

Palibhasa ay hindi naman siya ang baog, lalong umiigting ang kanyang kagustuhan na magkaanak. Isang araw, namalayan na lang niyang may karelasyon siyang babae na okey lang maging kabit at maanakan niya. Nanganak ang babae. Nalaman ni Aleli. Nakipaghiwalay siya at hinayaan na lang ang asawa na makisama sa babae.

Galit na galit kay Randy ang mga kapatid nito sa kanya. Magiging kalabisan kung sabihin kong pati mga pamangkin na anak ng mga kapatid niya ay galit sa ginawa nito. Bakit? Minahal nila nang labis si Aleli bilang hipag at tiyahin. Napakagaling kasi nitong makisama at napakabait. Palibhasa ay sabik na magkaroon ng anak, naging malapit si Aleli sa mga anak ng kapatid ni Randy. Kadalasan ay sa kanya inihahabilin ang mga bata kung may lakad ang mga magulang nito. Ang iba ay siya na halos ang nagpalaki sa mga ito.

Dumating ang panahon na nagkaroon ng family reunion ang pamilya ni Randy. Noon ay hiwalay na sila ni Aleli. Sinamantala niya ang pagkakataon at isinama ang kabit at anak nito na noon ay tatlong taon na. Gusto niyang ipakilala sa kanilang angkan ang kanyang bagong pamilya. Pero walang pumansin sa kanila, maliban sa kanyang ama at ina na halatang napilitan lang.

Ang point dito ng mga kapatid ni Randy, bilang paggalang sa kanilang hipag na si Aleli, hindi nila hahayaang maka-penetrate ang kabit ng kanilang kapatid  sa kanilang pamilya nang ganoon lang kabilis. Ano ‘yun, parang isang pagkakamali sa pagsusulat na basta na lang gagamitan ng eraser para mabura. Ganti nila iyon sa babae sa pagpatol nito sa kanilang kapatid kahit alam nitong may asawa ito.