BAWAL manigarilyo sa eroplano. Nanganganib ang lahat nang pasahero kapag ginawa ito. Pero hindi ito naisip ng isang babaing doctor. Nang ireklamo siya at kumprontahin ng flight attendant, ibinintang ito sa lalaking katabi.
Ang babae ay si Dr. Karen Halnon, 52. Pasahero ng American Airlines mula Nicaragua patungong Miami.
Nakunan ng video kung paano nagsindi ng sigarilyo si Halnon. Palinga-linga pa ito habang humihitit ng sigarilyo. Sa kaliwang kamay ay hawak niya ang lata ng softdrink at dito niya inilalagay ang abo ng sigarilyo. Ilang beses humithit at nagbuga ng usok ang doctor.
Nang magreklamo ang mga pasahero sa ginagawa ng doctor, agad niyang inilagay ang upos ng sigarilyo sa lata ng softdrinks at isiniksik sa pocket ng upuan.
Nang lapitan siya ng flight attendant at tanungin ukol sa paninigarilyo, sinabi niyang hindi siya naninigarilyo. Sa halip, itinuro niya ang lalaking katabi. Ito raw ang naninigarilyo at hindi siya.
Nang bumaba ang eroplano sa Miami International Airport, inaresto ng mga pulis si Halnon at kinasuhan ng disorderly conduct.