ISANG 9-anyos na batang lalaki ang nakaligtas matapos makipagbuno sa isang buwaya na may habang siyam na talampakan sa isang lawa sa Florida.
Ayon sa bata, na kinilalang si James Barney, nagbibisikleta siya nang maisipang maligo sa isang lawa na hindi bukas sa publiko. Naliligo na siya sa tubig nang maramdamang may bumabangga sa kanya.
Akala niya ay may ibang manlalangoy lang na nagbibiro sa kanya pero ang bumabangga na pala sa kanya ay isang buwaya na nakahanda na siyang sakmalin.
Nalaman niyang buwaya nang hawakan niya ito at maramdaman ang pangil at magaspang na balat nito. Kahit nagulat, agad pa ring nakakilos si James at pinagsusuntok ang buwaya. Nakagat siya sa puwit.
Kahit may sugat, mabilis siyang nakatakbo papunta sa pampang. Hanggang may sumaklolo sa kanya at dinala siya sa ospital.
Tinahi ang kanyang sugat sa puwit.
Nasa maayos na kondisyon si James at ayon sa mga doktor, makakauwi na siya mula sa ospital sa lalong madaling panahon.
Lubos na nagpapasalamat sa Diyos ang ama ni James na walang malubhang nangyari sa kanyang anak.