Habang umiinog itong ating mundo
Umiinog na rin ang utak ng tao;
Kaiba nga lamang ang pag-ikot nito
Sa halip pataas ay pababa ito!
At bakit nga hindi ating nakikita
Mataas na moral ngayo’y mababa na;
Ugali ng taong magalang maganda
Ay wala na ngayon saanman mapunta!
Isang halimbawa’y sa ngalang pag-ibig
Babae’t lalaki’y iba na ang nais;
Nagmamahal sila sa kahit na pangit –
Dahil sa mayama’y inaaring langit!
Sa mga tahanan itong kabataan
Sa mga magulang wala nang paggalang;
Sa halip katulong sa gawaing bahay
Lahat ay may bisyo at nasa lansangan!