Ulang walang tigil na nagpapabaha
Doon sa Mindanao ay nananalanta;
Mga baya’t bukid at waring nawala
Sa patak ng ulang halos walang tila!
Sinundan ng bagyo – kaya tagaroon
Nagsawa sa tubig na delubyo ngayon;
Ang mga tahanan nagiba rin doon
At ang mga tao’y hindi makabangon!
Talagang ang bansa’y parang niyuyugyog
Ng mga sakunang sa ati’y pagsubok;
Inakala nating sa taong pumasok
Wala nang trahedyang sa ati’y bangungot!
Pero bakit kaya itong kalikasan
Parang tinitikis itong ating bayan?
Ang taga-Mindanao ay salat sa yaman
Bakit pati sila’y pinahihirapan?