SINUNOD ni Mulong ang bilin ni Dick na bantayan sina Jinky habang nasa Maynila siya. Kahit na wala nang nalaÂlamang problema o banta si Dick, gusto pa rin niyang makasiguro na ligtas si Jinky lalo na sa gabing natutulog ito. Ayaw na ni Dick na malagay sa panganib ang buhay ng babaing minamahal.
Si Jinky pa nga ang tumututol sa kanyang plano. Huwag na raw magbantay si Mulong sapagkat kaÂwawa naman at mapupuyat lang ito. Wala na naman daw mga masaÂsamang loob dahil napatay na nga si Pac. Nahuli na rin ang mga bataan nito. NaÂwasak na ang laboratoryo ng shabu. Wala na ring krimen na nangyayari sa barangay nila dahil wala nang mga adik.
Pero ayaw ni Dick. KaÂilangang magbantay si Mulong. Tumalima naman si Mulong kaya ang nangyari, natutulog siya sa araw at sa gabi gising para magbantay. Maliban sa bahay, nagroronda rin si Mulong sa itikan. Kapag nakaisang ikot sa malawak na itikan ay babalik siya sa may gate ng bahay at doon mauupo. Nasanay na ang mata niya sa dilim. Hindi naman siya inaantok.
Nang gabing iyon, nakaÂrinig ng kaluskos si Mulong sa dakong likod ng bahay. Mabilis siyang kumilos. Hawak ang Kamagong na pag-aari ni Dick, dahan-dahan siyang nagtungo sa likod. Sa likod ay maraming puno ng Indian mango at lansones.
Bahagyang madilim. Tumigil siya at nakiramdam. Nawala ang kaluskos. Pero hindi siya umalis. Naghintay siya ng ilang minuto. Walang kaluskos o anupamang ingay.
Naisip ni Mulong na baka pusang lampong lang iyon. Naghahanap ng makakatalik.
Nagbalik siya sa puwesto.
Pero makalipas ang 20 minuto, may nararamdamang kakaiba si Mulong. Parang may nakatingin at nagmamatyag sa kanya. Pinag-aaralan ang kilos niya.
Hinigpitan niya ang pagkakahawak sa Kamagong. Kailangang maging handa siya.
Lalaban siya at ipagtaÂtanggol sina Jinky sa kung sinumang halimaw na sasalakay!
(Itutuloy)