Bakit ba ang tao’ may saya at lungkot
Sadya bang ganito tao sa sinukob?
May mga nilikhang sawa sa himutok
Dahil buhay nila ay buhay busabos?
At may tao namang kahi’t mariwasa
Saklot din ng lungkot ang puso at diwa;
Mga taong ito kahi’t masagana
Dahil nag-iisa ay mukhang kawawa!
Kaya anong buhay ang dapat angkinin
Na kung nalulungkot maging masayahin?
Ang dapat siguro’y maging madasalin
Upang ang biyaya’y sabay kung dumating!
Hilingin sa Diyos Kanyang isaayos
Ang takbo ng buhay dito sa sinukob;
Kanyang balansehin ang tuwa at lungkot
Sa puso ng tao na Kanyang nililok!