MANILA, Philippines — Isang motorcycle rider ang nasawi habang malubhang nasugatan ang kanyang backrider matapos masalpok ng ambulansya sa highway na sakop ng Barangay Tumbaga 1, Sariaya, Quezon, kamakalawa ng gabi.
Sa imbestigasyon ng Sariaya PNP, binabagtas dakong alas-7:00 ng gabi ng motorsiklong minamaneho ni “Michael” ang highway patungo sa Brgy. Sampaloc 2 nang masalpok ng ambulansya na noon ay patungo sa San Pablo City.
Nagtamo ng malubhang kapinsalaan sa iba’t-ibang bahagi ng katawan ang parehong sakay ng motorsiklo kung kaya isinugod ang mga ito sa ospital subalit idineklarang dead on arrival si “Michael “ habang patuloy na nilalapatan ng lunas ang angkas niyang si “Benito”.
Ayon naman sa driver ng ambulansya, nang marating niya ang intersection ng naturang barangay ay bigla umanong lumitaw ang motorsiklo sa kanyang unahan at nang subukang iwasan ay natumbok pa rin ito.