Magbayaw niratrat, 1 patay
Habang sinasalubong ang Bagong Taon
MANILA, Philippines — Namatay noon din ang isang 42-anyos na lalaki habang kritikal ang bayaw nito matapos pagbabarilin ng tatlong lalaki habang sinasalubong ang Bagong Taon sa tapat ng kanilang bahay kahapon ng madaling araw sa Brgy. H2, Dasmariñas City, Cavite.
Kinilala ang nasawi na si alyas Johnny, habang inoobserbahan ang bayaw nito na si alyas Christoper, 32, na kapwa nagtamo ng mga tama ng bala sa katawan.
Sa imbestigasyon ng pulisya, ala-1:00 ng madaling araw nang maganap ang pamamaril sa Interfashion Brgy. H2, Dasmariñas City kung saan nagdiriwang ng pagsalubong ng Bagong Taon ang magbayaw sa tapat ng kanilang bahay.
Masayang nagpapaputok ang mga ito nang dumating ang tatlong kalalakihan at isa sa mga ito ay armado ng .38 caliber revolver at pinagbabaril ang mga biktima.
Kapwa nagtamo ng mga tama ng bala ang dalawa kung saan nakatakbo pa ang biktimang si Christopher at humingi ng tulong habang namatay noon din si Johnny.
- Latest
