2 motor nagsalpukan: 1 todas
MANILA, Philippines — Idineklarang dead on arrival sa ospital ang isang 26-anyos na rider matapos sumalpok sa kasalubong na motorsiklo sa kahabaan ng Brgy. Iba, Silang, Cavite, kahapon ng madaling araw.
Kinilala ang nasawing biktima na si Marc Jandel Balsamo,chef,residente ng Brgy.Munting Ilog, Silang, Cavite.
Kasalukuyan namang inoobserbahan sa ospital ang nakasalpukan nito na kinilala sa alyas John, 22, mekaniko, residente ng Brgy. Sabutan, Silang, Cavite.
Sa report ng pulisya, bago naganap ang aksidente, ala-1:35 ng madaling araw sa Sitio Kite, Brgy. Iba, Silang, Cavite ay sakay ang biktima ng kaniyang Yamaha Mio na kulay itim (6022 TK) at papauwi na sana galing ng Silang Town Proper nang makasalpok ang kasalubong na Honda Wave, na pula na walang plate number na minamaneho ni John.
Kapwa tumilpon ang dalawa kung saan napuruhan ng husto ang ulo ni Balsamo at hindi na umabot ng buhay sa ospital.
- Latest
