Bangkay ng lalaki na nakabalot ng kurtina, natagpuan

MANILA, Philippines — Isa pang bangkay ng di kilalang lalaki ang natagpuang nakabalot sa kurtina at itinapon sa gilid ng kalsada sa Rodriguez, Rizal, kahapon.

Sa ulat ng Rodriguez Municipal Police Station, alas-7:45 ng umaga nang madiskubre ang bangkay sa gilid ng kalsada sa Sitio Udiongan, Brgy. Macabud, Rodriguez ng isang residente.

Ang nadiskubreng bangkay ng lalaki ay nakabalot sa kurtina at may gapos ng lubid.

Nabatid sa pulisya na ito na ang ikalawang pagkakataon na may bangkay na natagpuan sa naturang lugar na ang una ay Disyembre 18 na nakabalot naman sa kumot nang natagpuan ng isang barangay tanod sa madamo at liblib na bahagi ng sementeryo sa Brgy. Macabud.

Patuloy na inaalam pa naman ng mga otoridad kung iisa ang salarin sa pagpatay sa dalawang biktima dahil sa parehong kaparaan ang pagpatay at pagtatapon sa bangkay.