MANILA, Philippines — Anim na rebeldeng New People’s Army ang nasawi nang makaengkwentro ang 19th Infantry “Commando” Battalion sa Barangay Paco, Las Navas, Northern Samar noong Lunes.
Ang mga nasawi ay miyembro ng Subregional Committee Emporium, Eastern Visayas Regional Party Committee sa ilalim nina Ariel Baselga alyas Poly at Aries.
Isang sibilyan ang nag-tip sa mga tropa na may isang grupo ng mga armadong lalaki ang dumaraan sa barangay.
Ipinakalat ang mga sundalo at nadiskubre ang isang pinagtaguan ng NPA, na napapaligiran ng mga ipinagbabawal na anti-personnel mine.
Tumawag ang mga tropa sa suporta ng artilerya at nakipagbakbakan sa mga rebeldeng komunista sa loob ng halos 30 minuto at limang lalaki at isang amasona ang napatay.
Narekober sa lugar ang dalawang M16 rifle, dalawang pistola, tatlong granada, at mga personal na gamit.