Magkapatid na Pinoy, 2 pa todas sa pamamaril sa California

MANILA, Philippines — Apat katao ang nasawi kabilang ang magkapatid na Pinoy sa naganap na pamamaril sa kanilang tahanan sa Lancaster, California, USA noong Sabado ng umaga.

Kinilala ang magkapatid na Pinoy na nasawi na sina Janvi Maquindang at Christine Asa-Ca ma­ging ang fiancé ng huli na si Edwin Garcia at tatlo nilang aso ay namatay din.

Namatay noon din ang tatlo habang ang partner na si Maquindang na si Matthew Montebello ay namatay sa ospital.

Rumesponde ang mga pulis at bumbero, ala-1:00 ng madaling araw nitong Sabado sa bahay ng mga biktima para patayin ang sunog, subalit hindi malaman kung ano ang dahilan nito.

Naglunsad na ang pamilya Maquindang ng isang fundraising para makatulong sa gastusin at sa mga kapatid ng mga biktima.

Wala pa naman naa­restong suspek ang mga otoridad na responsable sa naturang krimen.