Maguindanao buy-bust ops…
MANILA, Philippines — Dalawang miyembro ng Philippine National Police-Drug Enforcement kabilang ang isang policewomen na nasawi habang apat pa ang sugatan nang mauwi sa engkwentro ang isinagawang buy bust operation sa Sultan Kudarat, Maguindanao, kahapon ng umaga.
Pansamanatalang hindi muna pinangalanan ang nasawing pulis na may ranggong Corporal at Patrolman.
Habang ang dalawang sugatang suspek ay kinilala sa alias na Ting at Kasing na nilalapatan ng lunas sanhi ng tinamong tama ng bala at maging ang dalawang sugatang pulis na may ranggong Patrolman.
Ayon kay BGen. Jean Fajardo, Chief ng PNP Public information Office (PNP-PIO), alas-11:40 ng umaga nang magsagawa ng buy-bust operation ang PNP-PEG Bangsamoro Autonomous Region sa Brgy. Simuay, Sultan Kudarat, Maguindanao.
Nabatid na nagpanggap na mga buyer ang dalawang pulis at nakatakdang iabot ang biniling isang kilo ng shabu nang makatunog ang mga suspek.
Agad na binaril sa ulo ng mga suspek ang dalawang pulis na ikinasawi ng mga ito kaya agad na gumanti ng putok ang mga kasamang mga operatiba.
Makalipas ang ilang minutong palitan ng putok, nasugatan ang 2 pulis at 2 suspek na isinugod sa pagamutan upang malapatan ng lunas.
Patuloy naman ang isinagawang imbestigasyon ng mga otoridad kaugnay ng nasabing insidente.