Erice naghain ng supplemental motion sa pagbasura ng kontrata ng Comele-Miru

MANILA, Philippines — Para mapawalang bisa ang joint venture ng Commission on Elections (Comelec) at poll service provider na Miru System ay naghain ng supplemental motion sa Korte Suprema si dating Caloocan City Congressman Egay Erice.

Ayon kay Erice, dapat nang ideklarang null and void ng SC ang kontrata sa pagitan ng Comelec at Miru matapos na mag-withdraw ang local partner nito na St. Timothy.

Sapat nang dahilan ang pag-alis ng St. Timothy sa joint venture para mapawalang-bisa ang kontrata nito sa Comelec.

Aniya, kung kumalas ang isang kasama sa joint venture wala na ring bisa ang partnership kaya dapat lamang na hindi ituloy ang kontrata ng MIRU.

Bunsod nito, dapat na atasan ng Comelec ang joint venture na magsumite ng Net Financial Contracting Capacity (NFCC) na una nang isinumite ng St. Timothy.

Paliwanag ni Erice, sa pagkalas ng St.Timothy, wala nang katiyakan na sapat ang pondo sa nasabing kontrata.

Umaasa si Erice na bibigyan pansin ng SC ang kanyang petisyon para sa hinahangad na maayos at tapat na halalan sa 2025.