4 opisyal ng OVP na-cite in contempt, ipinapaaresto

MANILA, Philippines — Apat na opisyal ng Office of the Vice President (OVP) ang na-cite in contempt dahil sa paulit-ulit nilang hindi pagharap sa House panel inquiry sa paggamit ng budget ng OVP at ng Department of Education noong nasa ilalim ito ni Vice President Sara Duterte.

Kinilala ang apat na na-cite in contempt na sina Lemeul Ortonio, Gina Acosta, Sunshine Fajarda at Eduard Fajarda.

Ginawa ni House De­puty Speaker Jayjay Sua­rez ang mosyon sa isang pagdinig noong Lunes matapos malaman mula sa Committee Secretariat na tatlong beses nang binalewala ng apat ang mga imbitasyon ng panel at ang subpoena ad testificandum ng limang beses.

May detention order din ang contempt order laban sa apat sa Batasang Pambansa Complex sa Quezon City.

Naibigay na rin ang isang immigration lookout bulletin order sa mga indibidwal na ito ng mga otoridad ng Immigration dahil sa kanilang pagtanggi na magpakita sa isang legislative inquiry.

Kabilang ang apat sa pitong opisyal ng OVP na nauna nang nagsumite ng position paper na nagsasabing tatanggi silang dumalo sa pagpapatuloy ng imbestigasyon ng House good government at public accountability committee sa paggamit ng budget ng ahensya.

Sa kanilang posisyong papel, itinuro nila ang karapatang tanggihan ang imbitasyon, sinabing ang mga opisyal at tauhan ng OVP ay iniimbitahan na dumalo sa kanilang kapasidad bilang mga resource person.