Nasawi kay Kristine at Leon, umakyat na sa 145 — NDRRMC

MANILA, Philippines — Inihayag kahapon ng National Disaster Risk Reduction and Management Council (NDRRMC) na umakyat na sa 145 katao ang naitalang death toll sa pinagsamang epekto ng bagyong Kristine at Leon.

Sa kabuuang naitalang death toll ay 14 pa lamang dito ang naisyuhan ng sertipikasyon ng Department of Health (DOH).

Ayon sa NDRRMC, 115 naman ang naita­lang sugatan at sampu pa ang mga nawawalang indibidwal na patuloy na pinaghahanap.

Umaabot na sa 1.79 milyong pamilya o kabuuang 7.03 milyong katao ang naapektuhan ng ka­lamidad sa 17 rehiyon na hinambalos nito sa bansa.