Tent ng kandidato sa Undas, papayagan – MMDA
Pero bawal mangampanya
MANILA, Philippines — Inihayag ng Metropolitan Manila Development Authority (MMDA) na kanilang papayagan ang pagtatayo o paglalagay ng tent ng mga pulitiko sa mga sementeryo sa Undas para mamigay ng pagkain at inumin.
Sinabi ni MMDA Chairman Don Artes, na iwasan lamang na mangampanya ang mga political aspirant at huwag samantalahin ang pagkakataon na para sa pagbibigay galang sa mga namayapang mahal sa buhay.
Ang apela ay ginawa ni Artes, kasabay ng pulong-balitaan sa mga kinatawan ng 17 local government units (LGUs) sa Metro Manila at ilang concerned government agencies sa pagsasapinal ng “Oplan Undas 2024” nitong Oktubre 18.
“Ako naman po ay naniniwala na may sense of decency pa rin ang mga pulitiko na hindi nila sasamantalahin ang pagkakataong ito..,”ani Artes.
Dapat din aniyang, sumunod sila sa itinakdang regulasyon ng local government units (LGUs) para sa kaayusan at kapayapaaan sa mga sementeryo.
Una nang nagpaalala ang Manila City government na bawal ang anumang pagtitipon ng pribado o grupong pulitkal sa loob ng mga sementeryo sa Maynila sa Undas.
Kabilang sa priority areas ang limang public cemeteries na kinabibilangan ng Manila North Cemetery, Manila South Cemetery, Bagbag Public Cemetery in Quezon City, Loyola Memorial Park sa Marikina, at San Juan Public Cemetery na tututukan ng mga awtoridad at MMDA .
- Latest
