MANILA, Philippines — Isang negosyante at tauhan nito na matansero ang nasawi habang dalawa pa ang sugatan matapos pagbabarilin sa loob ng kanyang meat shop kahapon ng madaling araw sa Quezon City.
Idineklarang dead on arrival sa Bernardino Hospital ang mga biktimang sina Romeo Collado, 43, meat shop owner at April Boy Lutao Cerbito, 27 habang nagpapagaling naman sina Alejandro Turo Agnes, 44 at misis ni Romeo na si Melody, 42.
Target naman ng manhunt ng Quezon City Police District-Criminal Investigation and Detection (QCPD-CIDU) ang dalawang suspek na kapwa armado ng baril na mabilis nakatakas sakay ng motorsiklo.
Sa imbestigasyon, nangyari ang pamamaril, alas-2:30 ng madaling araw sa loob ng Russel Meat Shop sa Dumalay St., Brgy. Sta. Monica, ng lungsod.
Nabatid na naghahanda na ang mga biktima sa pagbubukas ng kanilang meat shop nang isa sa mga suspek ang pumasok at walang habas na pinagbabaril sina Romeo at Cerbito habang tinamaan ng ligaw na bala sina Agnes at Melody.
Matapos ang pamamaril, tumakas ang mga suspek patungong Quirino Highway.