MANILA, Philippines — Ibinasura ng hukuman ang kahilingan ng kampo ng detenidong si Kingdom of Jesus Christ (KOJC) founder Pastor Apollo Quiboloy na maisailalim ito sa hospital arrest.
Nabatid na noong Setyembre, umapela ang kampo ni Quiboloy sa Pasig City Regional Trial Court (RTC) Branch 159 na ma-hospital arrest ito, gayundin ang kanyang kapwa akusado na si Ingrid Canada.
Iginiit nito na may medical conditions sina Quiboloy at Canada at nahihirapan sa kanilang pananatili sa custodial facility.
Ayon kay Atty. Israelito Torreon, abogado ni Quiboloy, maghahain sila ng motion for consideration upang iapela ang naturang desisyon ng hukuman.
Si Quiboloy ay nahaharap sa non-bailable qualified human trafficking charge at child abuse na kasalukuyang nakapiit sa Philippine National Police Custodial Center sa loob ng Camp Crame.
Si Canada naman ay nakapiit sa Pasig City Jail, kasama ang iba pa nilang kapwa akusado.