Solon kay Bato: Delicadeza pairalin sa planong Duterte drug war probe
MANILA, Philippines — Pinasaringan ni House Committee on Public Order and Safety chairperson at Santa Rosa City Rep. Dan Fernandez ang plano ni Sen. Ronald Dela Rosa na magsagawa ng imbestigasyon kaugnay ng war on drugs campaign ni dating pangulong Rodrigo Duterte.
Para kay Fernandez, malinaw na mayroong conflict of interest sa plano ni Dela Rosa dahil siya ang hepe ng Philippine National Police (PNP) nang ilunsad ang war on drugs campaign noong 2016.
“Delicadeza na lang sana ang pairalin ni Sen. Bato. For me it is highly inappropriate for him, the chief enforcer of the drug war, to lead a probe into the very operations he designed and implemented,” sabi ni Fernandez.
“As the architect of the war on drugs, Sen. Bato would be practically investigating himself. This undermines the integrity and objectivity of any findings that may result from this investigation,” dagdag pa nito.
Nauna nang sinabi ni Dela Rosa na malamang ay dumalo si Duterte kung kaniyang iimbestigahan. Ayon sa senador, mas komportable ang dating Pangulo sa Senado kaysa sa Kamara de Representantes.
Si Duterte ay mayroong standing invitation sa quad committee ng Kamara na nagsasagawa ng imbestigasyon sa kaugnayan ng iligal na operasyon ng POGO, bentahan ng iligal na droga at extrajudicial killings sa Duterte war on drugs campaign.
- Latest
