2 senior pinatay, bangkay itinago sa lababo, banyo

MANILA, Philippines — Bunsod ng masangsang na amoy, nadiskubre ang naaagnas nang bangkay ng magpinsang senior citizen na itinago pa sa isang cabinet sa may lababo at sa banyo, kahapon ng madaling araw sa Novaliches, Quezon City.

Kinilala ang mga biktima na sina Elpidio Aguillon Agduyeng, 71 at Imelda Barcarse, 65 kapwa residente ng Blk 10 Lot 10 Espoleto Street, St. Francis Village, Barangay San Bartolome, Quezon City.

Sa pagsisiyasat ng Quezon City Police District-Cri­minal Investigation and Detection Unit (QCPD-CIDU), natagpuan ang bangkay ng mga biktima dakong alas-3 ng madaling araw sa nabanggit na address.

Nabatid na nakatanggap ng reklamo si Sigfrid Galvez Amante, Homeowner’s Association President ng nasabing village dahil sa masangsang na amoy na nanggagaling sa nasabing bahay.

Kasama ang mga pulis at barangay officials tinungo nila ang bahay at nakitang nasa state of decomposition na ang mga bangkay. Natagpuan ang bangkay ni Barcarse sa kabinet sa ilalim ng lababo habang sa banyo naman si Agduyeng.

Patuloy ang imbestigasyon ng pulisya sa insidente.