Mga pulis na may kaanak na tatakbo sa halalan, ililipat ng puwesto

MANILA, Philippines — Nakatakdang simulan ng liderato ng Philippine National Police (PNP) ang pagtukoy sa bilang ng mga pulis na may kaanak na kakandidato sa 2025 midterm elections upang mailipat ng puwesto.

Ayon kay PNP Public Information Office Chief Col. Jean Fajardo, tulad ng nakaraang sistema, ginagawa na ito ng Directorate for Personnel and Records Management para matiyak na walang masasangkot na pulis sa partisan politics.

Ang matutukoy na pulis na may kaanak na tatakbo sa kanilang area of assignment ay tiyak na malilipat ng pwesto base na rin sa Standard Operational Procedure na sa PNP.

Pero, mangyayari ito matapos ang paghahain ng Certificates of Candidacy dahil dito malalaman kung sinu-sino ang opisyal na tatakbo sa halalan sa susunod na taon.

Ang filing ng COC ay itinakda ng Comelec sa Oktubre 1 hanggang Oktubre 8.

Nauna nang nagbigay ng babala si PNP Chief Gen. Rommel Francisco Marbil na hindi niya pahihintulutan na magamit ng mga pulitiko ang mga ­pulis para maimpluwensyahan ang halalan.