MANILA, Philippines — Inaresto ng mga otoridad ang isang negosyante na umano’y pangunahing suspek sa pagpatay kamakailan kay Navy Intelligence officer IS3 Ronald Silanga sa Sto. Tomas, Batangas.
Kinilala ang suspek na si Caezar Mangubat, 37, negosyante at may-ari ng isang construction firm na unang humingi ng tulong sa isang programa sa radyo bago isinuko sa mga otoridad ng pulisya.
Ayon kay Mandalauyong City police chief, Lt. Col. Titoy Jay Cuden, ang pag-aresto kay Mangubat ay batay sa warrant of arrest na inisyu ni Hon. Mary Grace Bonsol-Cabal, Presiding Judge ng Regional Trial Court, Fourth Judicial Region, Branch 35, Calamba City, Laguna na may petsang Sept. 23, 2024.
Walang piyansang inirekomenda para sa kanyang pansamantalang kalayaan at ngayon ay nasa kustodiya ng pulisya ng Calamba.
Pinaghahanap pa ang kasama ni Mangubat, kanyang security aide na si Hipolito Gibe Jr., dating gerilya ng New People’S Army na nakalista bilang Regional level- Most Wanted Person sa rehiyon ng Calabarzon.
Ang dalawa ay itinuro ng isang tricycle driver at kasama nitong babae na bumaril sa biktima na ang bangkay ay natagpuan pasado alas-10:00 ng gabi noong Setyembre 6 sa isang abandonadong sasakyan na nakaparada sa kahabaan ng Maharlika Highway sa Barangay San Rafael, Sto.Tomas, Batangas.