P6.352 trilyong 2025 national budget aaprubahan sa Miyerkules

MANILA, Philippines — Sa darating na Miyerkules ay nakatakda nang aprubahan sa ikatlo at pinal na pagbasa ang P6.352 trilyong pambansang pondo ng admi­nistrasyon ni Pangulong Ferdinand Marcos Jr. matapos ang dalawang linggong debate sa plenaryo ng Kamara.

Sinabi ni Speaker Ferdinand Martin Romualdez nitong Linggo na ang mga mambabatas ng Kamara ay nagtrabaho ng maigi sa isinagawang masusing deliberasyon sa plenaryo para umabot  sa timeline ang pag-aapruba sa 2025 General Appropriations Bill (GAB).

Ayon kay Romualdez, lider ng mahigit 300 mambabatas ng Kamara na ang pag-aapruba sa pambansang badyet sa susunod na linggo bago mag-recess ang Kongreso ay magbibigay sa Senado ng sapat na panahon para paglaanan ang proseso ng debate at pagpapasa nito.

Binigyang diin ni Romualdez ang pambansang pondo ay magsisilbing instrument ng gobyerno para mapalaganap ang dividends ng progreso sa ekonomiya sa pamamagitan ng sari-saring proteksiyon at inis­yatibo sa pinansyal na ayuda gayundin sa pagpopondo sa imprastraktura tulad ng mga kalsada, hospital, klasrum, pantalan, airport, irigasyon at transportation networks.