4 banyaga timbog sa mga baril at bala

MANILA, Philippines — Inaresto ng mga otoridad ang dalawang Chinese at dalawang Vietnamese national nang masamsaman ng mga baril at bala sa isinagawang search warrant sa kanilang tinutuluyan sa Makati City, kamakalawa ng gabi.

Kinilala ang mga naarestong suspek na sina Kaiyong Zhou, lalaki, 28; Phuong To Chau, babae, 30, kapwa Vietnamese nationals; Li Shusong, lalaki, 33; at Zhang Xiao Bo, lalaki, 22, kapwa Chinese nationals.

Sa ulat, alas-6:00 ng gabi nang isagawa ang operasyon sa ika-8 palapag ng Roxas Residence Tower II, Dasmariñas Condo, na nagresulta sa pagkasamsam ng 3 rifle at isang pistola at mga bala.

Ang pagsisilbi ng search warrant na inisyu ni City 1st Vice Executive Judge Cristina F. Javalera Sulit nang makakuha ng impormasyon na ang mga suspek ay may iligal na aktibidad.