MANILA, Philippines — Asahan na ang paglutang ng iba pang biktima ni Kingdom of Jesus Christ (KOJC) leader Pastor Apollo Quiboloy.
Ito ang kinumpirma ni Philippine National Police Spokesperson PCol. Jean Fajardo kaugnay ng pagpapatuloy sa imbestigasyon ng kasong pang-aabuso ni Quiboloy.
Ayon kay Fajardo, sa loob ng higit dalawang linggong operasyon sa paghahain ng warrant of arrest laban kay Quiboloy ay maraming biktima ang lumapit sa kanila upang ibunyag ang pang-aabuso ni Quiboloy.
Sa katunayan, mismong ang mga magulang ng mga biktima ang lumapit sa mga otoridad para isuplong ang mga pang-aabusong dinanas ng kanilang mga anak sa kamay ni Quiboloy.
Tumanggi naman si Fajardo na magbigay ng mga karagdagang detalye ukol dito at kung ilan ang mga complainant at tiniyak na sapat ang seguridad sa mga biktima.
Kasalukuyan nang isinasailalim ng pulisya sa kaukulang dokumentasyon upang maisampa na ang panibagong kaso sa korte.