Trabahador, nahulog sa container van, patay

MANILA, Philippines — Isang lalaking trabahador ang nasawi nang mahulog mula sa tinutuntungang container van sa loob ng Manila Harbor Center sa Tondo, Maynila, kahapon ng tanghali.

Naisugod pa sa Tondo Medical Center ang biktimang si Randy Transmanio, trabahador ng load container yard, at residente ng North Bay Boulevard South (NBBS), Navotas City ngunit binawian din ng buhay dahil sa pinsalang tinamo sa ulo at katawan.

Batay sa ulat ng Raxabago Police Station (PS-1) ng Manila Police District (MPD), alas-12:00 ng tanghali nang maganap ang insidente sa loob ng Brightpoint Logistics Corporation, na matatagpuan sa loob ng Manila Harbor Center sa Tondo.

Sa salaysay ng testigong si Jumar, nabatid na bago ang insidente ay nakasakay ang biktima sa ibabaw ng isang container van at inaasistihan ang crane operator sa pag-aayos nito.

Gayunman, dahil sa masamang panahon at malakas na hangin ay bigla umanong gumalaw ang container van na nag­resulta upang mawalan ng balanse ang biktima at mahulog sa sementadong sahig.