MANILA, Philippines — Isang 27-anyos na anak ang malubhang nasugatan nang saksakin ng kanyang tatay dahil sa ginawa umano nitong pag-ubos sa kanilang tanghalian sa Brgy. San Jose, Viga, Catanduanes kamakalawa ng tanghali.
Kinilala ang biktima na si Roby, binata, construction worker na nagtamo ng isang tama ng saksak sa kaliwang dibdib habang kalaboso naman at nahaharap sa kasong tangkang pamamaslang ang tatay na si Berting, 60, kapwa residente ng naturang lugar.
Sa ulat, alas-12:00 ng tanghali umuwing lasing ang suspek mula sa pakikipag-inuman. Gayunman, laking galit nito nang magbungkal ng makakain ay wala na itong mahagilap. Agad nitong kinompronta ang anak na nagduduyan sa bahay ng kapatid kung bakit kinain ang kanyang pananghalian dahilan para mainit na nagkasagutan ang mag-ama.
Umuwi ang suspek at kumuha ng kutsilyo saka tinarakan sa dibdib ang anak. Mabilis na umawat sa pananaksak ang isa pang anak nito at duguang isinugod sa Viga District Hospital ang biktima.