MANILA, Philippines — Limang indibidwal na itinuturong nasa likod nang pagpatay sa beauty queen na si Geneva Lopez at kanyang Israeli boyfriend na si Yitzhak Cohen ang pormal nang sinampahan ng Philippine National Police-Criminal Investigation and Detection Group (PNP-CIDG) sa Department of Justice (DOJ) ng dalawang bilang ng kasong murder.
Mismong si PCol. Thomas Valmonte, hepe ng Legal Division ng PNP-CIDG, ang nanguna sa paghahain ng kaso laban sa limang respondents, na kinabibilangan ng dalawang dating pulis.
Dalawa umano sa mga suspek ang bumaril sa mga biktima habang dalawang kasama ang nagtapon sa bangkay ng magkasintahan.
Bukod sa kasong murder, mahaharap din sa kasong conspiracy ang mga suspek matapos na magpulong muna at umano’y planuhin ang pagpatay sa mga biktima.
Una nang lumitaw sa imbestigasyon ng mga otoridad na isang dating pulis ang posibleng utak sa krimen at may kinalaman ang pagpatay sa lupang isinanla ng dating pulis kay Lopez.
“Based sa investigation, iyong lupa ay sinangla ng respondents sa biktima and parang gusto bawiin nila ang lupa sa mga biktima… Yung mga biktima parang ayaw naman nilang ibigay kasi siyempre meron binigay silang pera so dapat ibalik sa kanila ang pera,” ani Valmonte.
Pinuntahan umano ng mga biktima ang lupain noong Hunyo ngunit hindi na nakauwi pa ang mga ito.
Hulyo na nang matagpuan ang kanilang bangkay sa isang quarry site sa Barangay Sta. Lucia, sa Capas.