MANILA, Philippines — Dalawang katao ang nasawi kabilang ang isang lalaki na nagdiriwang ng kanyang kaarawan nang sila ay pagbabarilin sa ulo ng isang suspek kahapon ng madaling araw sa Caloocan City.
Namatay noon din ang birthday celebrator na si Jose Enrico Madriaga, 25, ng Phase 8, Package 10, Blk. 105 Lot Excess Brgy. 176, Caloocan City at kaibigang si Leonard Nogal, 25, construction worker dahil sa tama ng mga bala ng baril sa ulo. Habang sugatan naman ang isang James Richard, 24.
Agad naaresto ang suspek na si Carlos Chavez, 24, isang pintor sa isinagawang follow-up operation ng mga pulis.
Batay sa ulat, ala-1:00 ng madaling araw nang mangyari ang krimen sa bahay ni Madriaga na nagdiriwang ng kaarawan kasama ang mga kaibigan.
Habang masayang nag-iinuman ay pumasok ang suspek at pinagbabaril ang mga biktima at pagkatapos ay mabilis na tumakas dala ang ginamit na baril.
Nakuha sa crime scene ang limang basyo ng caliber 45 na bagama’t nahuli ang suspek ay hindi naman nabawi ang ginamit nitong baril. Inihahanda na ang kaso laban sa suspek.