VP Sara tinuligsa ng mga solon sa paninisi sa Marcos admin

MANILA, Philippines — Tinuligsa ng mga miyembro ng Kamara de Representantes si Vice President Sara Duterte sa walang basehan na paninisi nito sa administrasyong Marcos.

Ayon kay House Appropriations Committee Vice chairman Jil D. Bongalon ng Ako Bicol Partylist kung mali ang ginawang paggamit ng pondo ng Department of Education (DepEd) dapat ay nagsalita ito noong siya pa ang kalihim ng ahensya. Sinabi ni Bongalon na sa pagdinig ng Appropriations Committee sa budget ng DepEd hindi si VP Sara ang sumasagot ng mga mahahalagang tanong kundi ang pinasasagot nito ay ang kanyang mga undersecretaries.

Sinabi naman ni House Deputy Majority Leader at Iloilo Rep. Janette Garin na lumabas sa imbestigasyon ng Kamara na bilyun-bilyong halaga ng libro at mga gamit sa eskuwelahan ang nakatambak sa warehouse at hindi naipamigay sa mga paaralan.

Sinabi naman ni ACT Teachers Partylist Rep. France Castro na nagpapalusot na lamang si Duterte sa kanyang pagre-resign sa DepEd at ang tunay na dahilan ng kanyang pagmamaktol ay hindi nito nakuha ang kanyang gusto.

Duda naman si Manila Rep. Joel Chua na naglalabas ng mga kritisismo si VP Duterte upang pagtakpan ang kanyang pagbabakasyon sa Germany habang ang Pilipinas ay sinasalanta ng bagyong Carina.

Hinamon naman nina Zambales Rep. Jay Khonghun at La Union Rep. Paolo Ortega V si VP Duterte ang mga isyu ng P125 milyong confidential funds na naubos nito sa loob ng 11 araw at ang extrajudicial killings sa Davao City kung saan ito dating mayor bago kung anu-anong kritisismo ang sabihin nito.