3 Vietnamese minors na gumagamit ng pekeng German passports, nasabat ng BI

MANILA, Philippines — Tatlong Vietnamese minors na gumagamit ng pekeng German passports ang nasabat ng mga tauhan ng Bureau of Immigration (BI).

Ayon sa BI, blacklisted at hindi na maaaring makapasok pa sa bansa ang naturang mga Vietnamese, na ang isa ay 15-anyos lamang habang ang dalawa ay kapwa 17-anyos.

Nabatid na dalawa sa mga naturang dayuhan ay dumating sa Ninoy Aquino International Airport (NAIA) mula sa Saigon at nagsumite ng German passports, na ang mga may-ari ay may kahalintulad na facial features ng sa kanila.

 Gayunman, sa BI photo matching system, nadiskubre na mayroon lamang itong 4% at 9% match para sa mga biyahero.

Sinabi ni Immigration Commissioner Norman Tansingco na bagamat kahawig ng dalawang dayuhan ang mga larawan sa pasaporte, na-detect pa rin ito, dahil ang mga naturang pasaporte ay nag-hit sa Interpol derogatory check system, na nagsasaad na ang kanilang mga dokumento ay iniulat na nawala o ninakaw.

Inamin naman ng mga menor de edad na isang fixer ang nagbigay sa kanila ng mga pasaporte.