MANILA, Philippines — Isang mag-asawa ang natagpuang patay sa bulubundukin ng Sitio Capos, Barangay San Rafael, Sto. Tomas City, Batangas kamakalawa ng umaga. Kinilala ng pulisya ang mga biktima na sina alyas Edgardo, 20, construction at piggery worker at ang kinakasama nitong si alyas Kathleen, kapwa residente ng Barangay San Rafael.
Ang bangkay ng mag-asawa ay natuklasan ng isang saksi na kinilalang si Rustom Morano, alas-9:20 ng umaga.
Sinabi ni Lt. Col. Jun Lunar, hepe ng pulisya ng lungsod na ang mag-asawa ay pinatay sa pamamagitan ng paghataw sa kanilang mga ulo ng matigas na bagay ng dalawang suspek at pagkatapos ay binalot ng malaking nylon cover at itinapon sa bulubunduking lugar upang iligaw ang imbestigasyon at itago ang krimen.
Isa sa umatake sa mag-asawa ay kinilalang si alias Jano, 30, construction worker at piggery na naaresto sa bahay ng kanyang katrabaho sa Barangay San Antonio. Habang ang kasabwat ni Jano na kinilalang si Toto ay hinahanap ng mga otoridad.
Patuloy ang imbestigasyon sa motibo ng pagpatay sa mag-asawa ng mga suspek.