34 nasawi dahil sa habagat, ‘Carina’
![34 nasawi dahil sa habagat, �Carina�](https://media.philstar.com/photos/2024/07/26/araneta-flooding_2024-07-26_22-18-40.jpg)
MANILA, Philippines — Iniulat kahapon ng Philippine National Police (PNP) na umakyat na sa 34 ang bilang ng mga naiulat na nasawi sa Luzon dahil sa pananalasa ng Bagyong Carina at Habagat.
Karamihan sa mga naiulat na pagkamatay ay dahil sa pagkalunod, pagguho ng lupa, pagkakuryente, at pagbagsak ng mga puno.
Sa Calabarzon, sinabi ng Police Region Office 4A na 14 katao ang naiulat na namatay, kabilang ang lima sa Batangas, apat sa Rizal, at tatlo sa Cavite. Dalawang katao ang nawawala sa Cavite at Rizal, kung saan anim na iba pa ang sugatan.
Sa Metro Manila, sinabi ng National Capital Region Police Office na 11 katao ang naiulat na namatay kabilang ang tig-tatlo sa Maynila at Quezon City, gayundin ang tig-isa sa Malabon, Valenzuela, San Juan, Mandaluyong, at Pasay. Walong katao ang naiulat na sugatan sa Quezon City.
Samantala sa Central Luzon, sinabi ng Police Regional Office 3 na siyam katao ang naiulat na namatay, kabilang ang anim sa Bulacan at tatlo sa Pampanga.
Dalawang tao ang nawawala sa Bataan at Zambales. Tatlong iba pa ang nasugatan, kabilang ang dalawa sa Bataan at isa sa Pampanga.
- Latest