Romualdez, Tingog naglunsad ng relief ops sa typhoon Carina victims

MANILA, Philippines — Naglunsad na ang tanggapan ni Speaker Martin Romualdez at Tingog Partylist ng relief operations sa libu-libong pamilyang biktima ng bagyong Carina at habagat na nagdulot ng mala-Ondoy na pagbaha sa Metro Manila, Northern at Central Luzon.

Sinimulan nina Speaker Romualdez, Tingog Party­list Reps. Yedda Marie Romualdez at Jude Acidre ang pamamahagi ng relief operations kamakalawa sa mga biktima ng pagbaha sa Marikina City na nagkaloob ng inisyal na 20,000 food packs mula sa Disaster Relief Funds ni Speaker.

“The government, under the leadership of President Ferdinand ‘Bongbong’ Marcos Jr., has shown its commitment and dedication to responding to the needs of the people during this calamity,” pahayag ni Romualdez, lider ng Kamara na may mahigit 300 miyembro.

Ayon kay Romualdez , sa katunayan bumisita mismo si Pangulong Marcos sa tanggapan ng National Disaster Risk Reduction and Management Council (NDRRMC) para imonitor ang mga apektadong lugar na hinagupit ni Carina na pinalala pa ng habagat kung saan nakikipagkoordinasyon sila sa mga apektadong lugar para sa agarang tulong at epektibong relief operations .

Sinabi naman ni House Deputy Secretary General Sofonias “Ponyong “Gabonada , sa relief operations ng Kamara ay naghanda sila ng kabuuang 20,000 relief food packs na naglalaman ng tig 3 kilo ng bigas,  canned goods, kape at iba pang mga items.

Naghanda rin ang tanggapan ni Romualdez at ng Tingog Partylist ng hot meals at litro ng drinking water o maiinom na tubig sa pamamagitan ng Tingog Mobile Kitchen para sa 1,600 residente na pansamantalang lumikas sa evacuation center sa Malanday Elementary School sa Marikina City.