Sunog sa Caloocan, 1 babae patay

MANILA, Philippines — Isang babae ang kumpirmadong nasawi matapos na makulong sa nasusunog niyang bahay sa Brgy. Bagong Barrio, Caloocan City, kahapon ng madaling araw.

Hindi na nakalabas ang 58-anyos na biktima mula sa nasusunog na bahay na umano’y gumagamit lamang ng kandila. Nailigtas naman ang isang batang lalaki.

Ayon kay SFO4 Bene­dicto Tudla ng Bureau of Fire Protection, nangyari ang sunog dakong alas-4:00 ng madaling araw sa Arellano St.

Mabilis na kumalat ang apoy kung saan nadamay ang ilan pang kabahayan.

Mangiyak ngiyak naman ang mga nawalan ng tirahan dahil sa wala silang naisalbang gamit kabilang ang isang dialysis patient.

Idineklarang fire out ang sunog, alas-6:00 ng umaga habang tinata­yang nasa P200,000 ang danyos ng sunog.