MANILA, Philippines — Anim pang matataas na opisyal ang inilipat ng puwesto ni Philippine National Police (PNP) Chief General Rommel Francisco Marbil batay sa kanyang kautusan nitong Lunes.
Simula kahapon inilipat na si Police Lt. Gen. Jonnel Estomo sa Area Police Command – Southern Luzon mula sa Area Police Command – Western Mindanao.
Pinalitan ni Estomo sa Area Police Command – Southern Luzon si Police Maj. Gen. Marcelino Bazar na ngayon ay hepe ng Directorate for Information and Communications Technology Management (DICTM).
Papalit naman sa Area Police Command-Western Mindanao si Police Maj. Gen. Bernard Banac na mula sa Directorate for Police Community Relations (DPCR). Ang reassignment ni Banac ay bunsod ng kanyang promotion bilang Lieutenant General.
Hahalili kay Banac sa DPCR si Police Brig. Gen. Rhoderick Augustus Alba mula sa Directorate For Human Resource And Doctrine Development (DHRDD).
Si Police Brig. Gen. Erich Tan Royales naman na mula sa Personnel Holding and Accounting Unit, Directorate for Personnel and Records Management (PHAU, DPRM) ang itinalaga sa DHRDD kapalit ni Alba.
Habang si Police Brig. Gen. Neri Vincent Ignacio ay itinalaga sa Directorate for Comptrollership mula sa Directorate for Logistics.
Ito na ang ikawalong balasahan simula nang maupo si Marbil sa PNP noong Abril 1.