MANILA, Philippines — Kahit na dumaan ang panahon ng El Niño phenomenon , sobrang dami at oversupply na ang isdang Bangus sa Pangasinan.
Ito ang sinabi ni Director Nazer Briguera ng Bureau of Fisheries and Aquatic Resources (BFAR) nag-oversupply ang bangus sa Pangasinan dahil madami ang nagsulputang bangus farmers doon.
“Kaya kami sa BFAR ay tumutulong humanap ng direct buyer o cooperative o independent market na maaaring pagdalhan ng mga bangus.Pero mas ok na ang oversupply kaysa kulang sa suplay,” sabi ni Briguera.
Gayunman sinabi ni Briguera na dapat ma-regulate ang bilang ng mga magnenegosyo sa pag-aalaga ng bangus para maiwasan ang oversupply.
Hindi naman anya naapektuhan ang fishery industry ng El Niño dahil sa ilang lugar lamang ito tumama at ang ibang lugar naman ay may kakayahan na mapunan ang demand ng mamamayan sa mga isda at iba pang seafood products.
Nanatili namang nasa P140.00 hanggang P160.00 ang presyo ng kada kilo ng bangus sa bangus farm kahit na may oversupply nito at aabutin naman ng P160 hanggang P180 ang kada kilo nito sa mga palengke sa Metro Manila.