MANILA, Philippines — Namatay habang nilalapatan ng lunas ang isang 22-anyos na Sangguniang Kabataan (SK) kagawad sa Pangasinan na natagpuang may saksak sa bakanteng lote sa Barangay Ligue, Bayambang.
Kinilala ang biktima na si Carlos Miguel Ablao, SK kagawad sa Barangay San Pedro Afartado sa bayan ng Alcala.
Umaga noong Mayo 28 nang makita si Ablao na duguan at may saksak sa katawan sa bakanteng lote sa nasabing barangay at dinala sa ospital pero kinalaunan ay pumanaw din.
Ayon sa pamilya ng biktima, nagpaalam si Ablao na may dadaluhang birthday party noong gabi ng May 27 sa Alcala.
Pero nagpaalam daw ito sa mga kaibigan na aalis sakay ng motorsiklo hanggang sa makita ang kaniyang duguang katawan sa Bayambang, bagay na palaisipan sa kaniyang mga kaanak kung bakit siya napunta sa nasabing bayan.