Ban sa e-bike, e-trike na dumaan sa national road sa Metro Manila, simula ngayong araw

MANILA, Philippines — Kasado na ngayong araw ang pagbabawal sa e-trike at e-bike sa pagdaan sa mga national road sa National Capital Region (NCR).

Ito’y alinsunod sa ipinasang resolusyon ng Metro Manila Council (MMC) sa pamamagitan ng Metropolitan Manila Development Autho­rity (MMDA), noong Pebrero.

Nabatid na kabilang sa mga lansangan na hindi maaaring daanan ng mga light e-vehicles ay ang R1: Roxas Boulevard; R2: Taft Avenue; R3: SLEX; R4: Shaw Boulevard; R5: Ortigas Avenue; R6: Magsaysay Blvd/Aurora Blvd.; R7: Quezon Ave./ Commonwealth Ave.; R8: A. Bonifacio Avenue; R9: Rizal Ave­nue; R10: Del Pan/Marcos Highway/McArthur Highway; C1: Recto Ave­nue; C2: Pres. Quirino Avenue; C3: Ara­neta Ave­nue; C4: Epifanio Delos Santos Avenue; C5: Katipunan/C.P. Garcia; C6: Southeast Metro Manila Expressway; Elliptical Road; Mindanao Ave­nue; at Marcos Highway.

Bukod naman sa mga naturang light e-vehicles, hindi na rin pahihintulutan na dumaan sa mga naturang lansangan ang mga tricycle, pedicab, pushcarts at mga kuliglig.

Nagbabala naman ang MMDA na ang mga lalabag sa ban ay papatawan ng multang P2,500.