MANILA, Philippines — Mariing itinanggi ng Philippine National Police (PNP) ang akusasyon na sila ang nasa likod ng pagdukot kay Jose Marie Estiller, ang nakatatandang kapatid ng dating political prisoner at AMIHAN activist na si Jean Estiller.
Ayon kay PNP Chief PGen. Benjamin Acorda Jr., wala naman silang natatanggap na impormasyon hinggil dito.
Ani Acorda, handa naman silang aksiyunan at tulungan ang pamilya ni Estiller.
Sinabi ni Acorda, hindi dapat mag-alinlangan ang pamilya Estiller na humingi ng tulong sa kapulisan may sapat na impormasyon sa insidente.
Sa CCTV footage na lumabas online, makikitang dinukot ang biktima habang papasok ng kanyang tahanan kung saan 5 armadong lalake ang kumuha rito.
Una nang naglabas ng pahayag ang League of Filipino Students (LFS) kung saan kanilang kinokondena ang pagdukot kay Estiller na nangyari broaddaylight at sa isang subdivision.