P76 milyong marijuana sa balikbayan boxes, nabuko ng BOC
MANILA, Philippines — Tinatayang aabot sa 63 kilo ng pinatuyong dahon ng marijuana (kush), na nagkakahalaga ng humigit-kumulang sa P76 milyon na itinago sa loob ng ilang balikbayan boxes mula sa Thailand ang nabuko ng mga tauhan ng Bureau of Customs-Customs Intelligence and Investigation Service (BOC-CIIS), kamakalawa.
Ang limang balikbayan boxes na naglalaman ng dalawang mas maliit na kahon ay sumailalim sa 100% physical examination noong Martes, base sa alert order na hiniling ng CIIS-Manila International Container Port (CIIS-MICP) at inisyu ni District Collector Romeo Allan Rosales noong Pebrero 19, 2024.
“Based on the information we received, the alert order was issued against this shipment because of the suspected presence of illegal drugs. We found around 12 kilos of marijuana per balikbayan box during the inspection,” ayon kay BOC-CIIS Director Verne Enciso.
Nabatid na ang shipment ay naka-consigned sa Marcelo D. Laylo Cargo Forwarders, at ipinadala ng isang Gerard Cruz habang tatanggapin naman ng isang Erika Cruz, na residente ng Dasmariñas, Cavite na orihinal na idineklara bilang consolidated balikbayan boxes/personal effects mula sa Thailand.
Tiniyak naman ni Deputy Commissioner for Intelligence Juvymax Uy na hahanapin nila ang mga naturang indibidwal para makasuhan.
- Latest
