P100 dagdag-sahod gawing tatlong bagsakan

MANILA, Philippines — Iminungkahi ni Manila 3rd District Rep. Joel Chua na gawing tatlong bagsakan o unti-unti sa loob ng 3 taon ang pagpapatupad ng P100 umento sa arawang sahod ng mga manggagawa upang hindi mabigatan ang mga Micro Small Medium Enterprises (MSMEs).

Sinabi ni Chua na para maging ‘doable‘ o makaya­nan ang katas na umento sa minimum wage ay dapat na utay-utayin ito o gawing­ installment sa loob ng tatlong taon.

“Halimbawa: P40 on the first year, P40 on the second year, at P20 sa huling taon hanggang sa makumpleto ang P100 wage hike para sa NCR, Calabarzon, at Central Luzon Regions dahil yan ang mga region na mas may-kaya,” punto ng solon.

Para naman aniya sa iba pang rehiyon ay P35, P35, at P30 ang kakayaning umento sa minimum wage sa loob ng tatlong taon rin.

Binigyang diin ng solon na sa ganitong paraan, naka-schedule na ang mga umento ay hindi masa-shock ang mga negosyo at ang buong ekonomiya.

Sinabi ni Chua na pabor siyang itaas ang minimum wage ng mga manggagawa pero hangga’t maari aniya ay dapat magawan ng paraan ng pamahalaan na wala nang minimum wage sa anumang rehiyon sa Pilipinas na mas mababa sa poverty-threshold na P13,797 kada buwan.