MANILA, Philippines — Karamihang Pinoy ang pabor na magsagawa ng imbestigasyon ang International Criminal Court (ICC) hinggil sa usapin ng war on drugs ni dating Pangulong Rodrigo Duterte.
Sa isinagawang survey ng OCTA Research noong Disyembre 2023, naniniwala ang nasa 55 porsiyento ng mga Pinoy ang nais na lumahok ang Pilipinas sa ICC upang maisagawa ang imbestigasyon sa drug war ni Duterte habang nasa 45 porsiyento naman ang hindi pabor.
Lumilitaw sa record ng OCTA, na 65 porsiyento ang Balance Luzon, 52 porsiyento sa Metro Manila, 50 percent sa Visayas, habang 42 porsiyento sa Mindanao.
Gayunman, nakuha naman ng Mindanao ang mataas na porsiyento na 58 kung saan tutol ang mga Filipino na lumahok sa imbestigasyon ng ICC habang 35 percent lamang ang Balance Luzon.
Ipinakita rin sa survey na 67 porsiyento ng mga nasa 75-anyos pataas ang pabor habang hindi naman pabor ang 50 porsiyento na nasa edad 35-45.
Dagdag pa ng OCTA na suportado rin ng mga naninirahan sa mga lalawigan at probinsiya ang imbestigasyon ng ICC na nakakuha ng 57 percent kumpara sa nakuhang porsiyento ng mga taga-Metro Manila na 54.
Isinagawa ang Fourth Quarter 2023 Tugon ng Masa sa 1,200 adult respondents nationwide.